Nga foltorja e Kuvendit, kreu i Partisë Demokratike, Sali Berisha, kritikoi ashpër projektligjin e propozuar nga mazhoranca për barazinë gjinore dhe sulmoi ambasadorin e Bashkimit Evropian në Shqipëri, duke e cilësuar mbështetës të kësaj nisme.

“Po ndiqni tezën marksiste që parashikonte që njeriu modern është njeriu pa familje. Ambasadori i BE nuk mund t’i imponojë Shqipërisë bindjet e veta personale,” deklaroi Berisha.

Reagimi i tij nxiti menjëherë kreun e grupit parlamentar të Partisë Socialiste, Taulant Balla, i cili kërkoi masa ndaj deputetit demokrat.

“Dënoj sulmin e Berishës kundër ambasadorit të BE në Shqipëri. Këto janë sulme të përsëritura ndaj ambasadorëve në Shqipëri prej 35 vitesh. Ligji e specifikon qartë: ka vetëm burrë e grua. Do të bëj kërkesë që të japë shpjegime,” tha Balla.

Ngjarja riktheu tensionet mes dy palëve në Kuvend, duke nxjerrë në pah ndasitë për çështje ligjore dhe standardet e barazisë gjinore në vend.