Biznesmeni Valon Ademi, ortak me Behgjet Pacollin në Aeroportin e Vlorës, ka folur hapur në emisionin Opinion për konfliktin që ka lindur rreth ndërtimit dhe administrimit të këtij koncesioni.

Ademi pretendon se Pacolli ka shitur aksionet e Aeroportit të Vlorës tek kompania Delphos, e cila, sipas tij, lidhet me një tjetër kompani offshore, Compartment Bernina, për të cilën nuk dihet identiteti i pronarëve. Biznesmeni e konsideron këtë veprim një mashtrim dhe tradhti ndaj tij si ortak.

“Ai ka shitur MABCO-n. Ai të dha 100 milionë euro dhe për çfarë ta dha? Nuk është kredi… Delphos nuk është bankë. Compartment Bernina nuk e dimë kush është. Ishallah s’janë rusë përtej, se Behgjet Pacolli do dalë mashtrues dhe pastaj tradhtar,” u shpreh Ademi.

Ai theksoi se konflikti me Pacollin ka nisur në maj të këtij viti, pas veprimeve të Pacollit në projektin në Bengazi, Libia, ku sipas Ademit, Pacolli tentoi të transferonte fshehurazi stafin e tij në kompaninë e tij.

Ademi shtoi se çështja tashmë është ankimuar në Prokurorinë e Tiranës, dhe ka pritshmëri që autoritetet të veprojnë:

“Ose duhet të shkoj unë si hajdut në burg, ose ai si mashtrues. E kam kallëzuar Pacollin për mashtrim, ai më ka kallëzuar kundërpadi. Do të shohim kush do përgjigjet penalisht.”

Gjithashtu, biznesmeni foli për largimin e investitorëve turq, të cilët sipas tij, nuk dëshironin të vazhdonin investimin në aeroport dhe u tërhoqën pas marrjes së një shume të konsiderueshme parash, pa realizuar asnjë ditë pune.

“Në mbledhjen që thirra unë, përfaqësuesi i kompanisë YDA tha qartë se nuk mund të investojmë. Ata nuk derdhën asnjë lek për projektin, dhe kjo e tregon që gjithçka ishte fiktive,” shtoi Ademi.

Çështja pritet të ndjekë rrugën ligjore dhe të zbardhet nga autoritetet shqiptare, ndërsa tensionet mes ortakëve mbeten të larta dhe komplekse.