Izraeli ka konfirmuar se ka marrë një arkivol që, sipas Hamasit, përmban trupin e një pengu tjetër izraelit. Automjetet e Kryqit të Kuq morën trupin disa orë pas deklaratës së përbashkët të Hamasit dhe Xhihadit Islamik Palestinez, e cila tha se trupi ishte gjetur në zonën Khan Younis, në pjesën jugore të Gazës.

Zyra e kryeministrit izraelit njoftoi se arkivoli do të transferohet në Izrael, ku do të pritet me një ceremoni ushtarake përpara se të kryhet procesi i identifikimit. Ky dorëzim konfirmon se 25 nga 28 pengjet e ndjera janë kthyer tashmë në Izrael, sipas fazës së parë të marrëveshjes së armëpushimit, e cila është pjesë e një plani amerikan për të dhënë fund luftës në Gaza.

Marrëveshja parashikon që Hamasi të kthente 20 pengje të gjallë dhe 28 pengje të vdekur që ende i mbante. Të gjithë pengjet izraelitë të gjallë u liruan më 13 tetor, në këmbim të 250 të burgosurve palestinezë dhe 1,718 të paraburgosurve nga Gaza. Për çdo peng të vdekur të kthyer, Izraeli është dakord të dorëzojë eshtrat e 15 palestinezëve, megjithëse mungesa e testeve ADN në Gaza vështirëson identifikimin.

Hamas kishte marrë 251 pengje gjatë sulmit në jug të Izraelit më 7 tetor 2023, i cili shkaktoi 1,200 viktima izraelite, ndërsa më shumë se 69,000 palestinezë kanë humbur jetën në sulmet izraelite, sipas të dhënave të ministrisë së shëndetësisë në Gaza.

Para dorëzimit të fundit, nga katër trupat që ende ndodheshin në Gaza, tre ishin izraelitë dhe një ishte tajlandez. Izraeli akuzon Hamasin për vonesa të qëllimshme, ndërsa grupi palestinez thotë se po përpiqet t’i gjejë trupat nën rrënoja.