Një tjetër fatkeqësi ka goditur familjen Halili nga Tepelena. Pas vdekjes së të birit, Sulo Halili, i cili u gjet i vrarë dhe i djegur në Greqi, nëna e 27-vjeçarit ka ndërruar jetë nga një atak kardiak, dyshohet si pasojë e dhimbjes së thellë për humbjen e të birit të saj. E ndjera kishte qenë në gjendje të rënduar emocionale që prej 8 nëntorit, ditës kur u konfirmua se trupi i karbonizuar i Sulo Halilit ishte gjetur në zonën Skourta të Beotisë.

Hetimet e fundit zbardhin rrethana të reja për krimin e rëndë. Sipas mediave greke, 27-vjeçari dyshohet se ishte joshur përmes një aplikacioni takimesh nga një grua në zonën e Vilias. Në vend të një takimi, ai ra në kurth, u rrëmbye dhe u torturua për orë të tëra, para se të qëllohej dhe trupi i tij të digjej brenda një automjeti.

Makina ku u gjet trupi ishte vjedhur më parë në Glyfada dhe mbante targa të falsifikuara nga një automjet tjetër në Pieria, një detaj që sugjeron përfshirjen e një grupi të organizuar kriminal. Hetuesit besojnë se Sulo Halili mund të jetë vrarë në një vend tjetër dhe më pas trupi i tij është transportuar në Skourta për të zhdukur gjurmët.

Një nga provat kyçe për zbardhjen e ngjarjes është telefoni celular i viktimës, i cili ende nuk është gjetur dhe mund të zbulojë komunikimet e fundit të 27-vjeçarit.

Ngjarja ka tronditur komunitetin shqiptar në Greqi dhe banorët e Halkidës e Viotisë, të cilët e konsiderojnë këtë një krim me egërsi të pazakontë. Autoritetet greke theksojnë se hetimi është në fazën përfundimtare, dhe identifikimi i autorëve është vetëm çështje kohe.