Prej disa ditësh, forcat RENEA dhe trupat e FNSH-së kanë zhvilluar një operacion të gjerë kontrolli në zonën e Fushë-Krujës, në kërkim të elementëve të dyshuar kriminalë dhe bazave të mundshme të tyre.

Gjatë mëngjesit të sotëm, në Nikël, policia ka njoftuar zbulimin e një arsenali të rëndë armësh, municionesh dhe lëndësh shpërthyese, të cilat dyshohet se lidhen me grupime kriminale aktive në zonë. Autoritetet kanë identifikuar një prej personave që dyshohet se ka pasur në posedim armët, i cili është shpallur tashmë në kërkim.

Sipas informacioneve nga terreni, të konfirmuara edhe nga gazetari Edison Vatnikaj, gjatë kontrollit janë sekuestruar:

– një automatik
– një mitraloz
– pjesë armësh të ndryshme
– disa granata
– fishekë të kalibrave të ndryshëm
– fitil zjarr-përcjellës
– lëndë plasëse të aktivizueshme me telefon për shpërthim në distancë

Kontrollet e shtuara në këtë zonë lidhen me atentatin e 11 nëntorit pranë aeroportit të Rinasit, ku u vra Gilmando Dani dhe mbeti i plagosur agjenti i AMP-së, Muçi Shaljani, i cili ndodhej në të njëjtën makinë.

Policia po vijon kontrollet intensive në Fushë-Krujë, Nikël dhe zonat përreth, me synim zbulimin e bazave kriminale dhe kapjen e personave të përfshirë në aktivitetet e dhunshme të ditëve të fundit. Hetimet pritet të zgjerohen në ditët në vijim.

Sipas policisë, gjatë kontrolleve u gjetën në banesë: 3 kallëpë tritol; 12 granata dore sulmuese; sasi lëndësh plasëse gati për shpërthim, të montuara me kapsolla detonatore, fitil zjarrpërcjellës dhe celularë(mina); 3 ndezës granatash, kapsolla detonatore dhe 5 celularë; 4 armë zjarri (2 automatikë dhe 2 pushkë), 8 krehra dhe pjesë armësh; 6000 fishekë të kalibrave të ndryshëm; 2 kg e 25 gramë Cannabis.