Policia e Vlorës ka goditur një tjetër rrjet të shpërndarjes së drogës në qytet, duke finalizuar operacionin e koduar “Triple”, zhvilluar nga Seksioni për Hetimin e Narkotikëve në bashkëpunim me Njësinë e Mbështetjes Operacionale të Hetimit.

Në pranga kanë rënë tre shtetas të rinj nga Lushnja: Amarildo Rrethi (20 vjeç), Jozef Rica (25 vjeç) dhe Lorenc Kiptiu (21 vjeç), të cilët dyshohet se transportonin lëndë narkotike kokainë me qëllim shpërndarjen në Vlorë.

Si u kapën?
Policia, bazuar në informacione operative dhe vëzhgim të vazhdueshëm, ka ndaluar automjetin Volkswagen me të cilin lëviznin tre të rinjtë. Gjatë kontrollit, në lagjen Kushtrimi, nën timonin e mjetit u gjetën të fshehura 101 gram kokainë, e gatshme për tregun lokal.

Gjatë operacionit u sekuestruan gjithashtu 4 aparate celularë që dyshohet se përdoreshin për komunikimet e aktivitetit kriminal, si dhe automjeti me të cilin transportohej droga.

Të tre të arrestuarit akuzohen për veprën penale “Prodhimi dhe shitja e narkotikëve”, kryer në bashkëpunim. Hetimet vijojnë për të identifikuar lidhjet e tyre dhe rrjetin e shpërndarjes që përfitonte nga aktiviteti i tyre në Vlorë.