Analisti Paltor Nesturi ka bërë sot deklarata të forta lidhur me situatën brenda Partisë Socialiste dhe qeverisë Rama, duke mos përjashtuar mundësinë e ndryshimeve edhe në postin e kryeministrit. Ai foli për News 24, duke theksuar se lëvizjet kanë nisur dhe po ndodhin nën ndikimin e faktorëve të ndryshëm politikë dhe ndërkombëtarë.

Nesturi kujtoi intervistën e fundit të Gonzatos dhe rolin e SPAK-ut, duke nënvizuar se mbrojtja e këtij institucioni është e lidhur edhe me interesin e Bashkimit Europian. Analisti tha se ka përpjekje për të “zvogëluar SPAK-un” dhe se sulmet ndaj tij janë pjesë e një iniciative politike që synon të ndikojë në funksionimin e organit të drejtësisë.

Ai shtoi se brenda PS mund të ketë ndryshime të thella, duke prekur ministra, zv.kryeministra dhe figura të tjera me problematika ligjore. Nesturi nuk përjashtoi as mundësinë e ndryshimeve në krye të qeverisë dhe tha se Partia Socialiste po përpiqet të reagojë për të mbrojtur anëtarët e thjeshtë dhe për të ruajtur imazhin e saj.

“Besoj se brenda PS do të ketë lëvizje të re, që mund të jetë e dhimbshme dhe ka shansin ta bëjë ndryshimin e fytyrës së politikës. Nuk e përjashtoj që të ketë ndryshime edhe me kryeministër tjetër”, tha Nesturi, duke shtuar se iniciativa e lëvizjeve të brendshme nuk duhet të paguhet nga anëtarët më të thjeshtë të partisë.