Një operacion ndërkombëtar i policisë së Ekuadorit ka çuar në shkatërrimin e një rrjeti të trafikut të drogës drejt Europës dhe Afrikës, ku vlera e substancave të sekuestruara arrin mbi 360 milionë dollarë.

Gjatë operacionit u arrestuan 11 persona në Ekuador dhe 11 të tjerë në Spanjë, përfshirë 7 shqiptarë, të cilët dyshohet se ishin pjesë e grupit kriminal që përdorte tre kompani eksporti për të transportuar drogën drejt Spanjës, Belgjikës, Libisë dhe Holandës.

Përveç drogës, autoritetet sekuestruan edhe armë zjarri, telefona dhe dokumente që lidhen me aktivitetin kriminal. Emrat e shqiptarëve të arrestuar në Spanjë janë: Marjus Galan, Emanuel Rrapushi, Ilir Deda, Cristian Berishaj, Krener Meço, Sokol Cali dhe Klajdi Kolgjegja. Ndër të arrestuarit janë edhe shtetas të tjerë: Ricardo Zapata Rodríguez dhe Joaquín Ibor Catalá (spanjollë), Samuel Moreno Cuero (kolumbian) dhe Cristian Esteve Mena (domenikan).

Operacioni tregon përfshirjen e grupeve kriminale të Amerikës Latine në trafikun ndërkombëtar të drogës dhe bashkëpunimin mes autoriteteve të Ekuadorit dhe Spanjës për të goditur aktivitetin e paligjshëm.