Përmbytjet dhe rrëshqitjet e tokës, të shkaktuara nga javë të tëra reshjesh të jashtëzakonshme në Vietnam, kanë lënë të paktën 41 persona të vdekur dhe nëntë të zhdukur, duke detyruar evakuimin e dhjetëra mijëra banorëve. Autoritetet raportuan se rreth 62 000 njerëz janë larguar nga shtëpitë e tyre në zonat më të prekura, ku rrugët kryesore janë bllokuar nga rrëshqitjet e tokës dhe rreth një milion persona kanë mbetur pa energji elektrike.

Në rajonin malor të Da Lat, reshjet kanë arritur deri në 600 milimetra në disa zona që nga fundjava, sipas shërbimit meteorologjik. Media shtetërore “Tuoi Tre News” tha se kompania hekurudhore e Hanoit ka pezulluar disa linja që lidhin veriun me jugun, për shkak të përmbytjeve masive. Ministria e Mbrojtjes Kombëtare ka vendosur helikopterë në terren për të shpëtuar banorët e izoluar nga vërshimet.

Zëvendëskryeministri Ho Quoc Dung u kërkoi drejtuesve të tre provincave më të prekura të mobilizojnë ushtrinë, policinë dhe forcat e tjera të sigurisë për të evakuuar sa më shpejt popullsinë drejt zonave të sigurta, sipas një deklarate të qeverisë.

Sipas ekspertëve, ngrohja globale e shkaktuar nga aktivitetet njerëzore po i bën fenomenet ekstreme atmosferike më të shpeshta dhe më shkatërruese. Në Vietnam, fatkeqësitë natyrore kanë marrë të paktën 279 jetë gjatë këtij viti dhe kanë shkaktuar mbi dy miliardë dollarë dëme, sipas zyrës kombëtare të statistikave.