Moti i keq ka goditur rëndë jugun e vendit, ku reshjet e dendura kanë shkaktuar probleme serioze në disa zona. Në Çukë të Sarandës, argjinatura e lumit Bistrica është çarë, duke sjellë përmbytjen e qindra hektarëve tokë bujqësore.

Situata paraqitet e rënduar edhe për katër barinj që ndodhen të izoluar në një stallë me qindra krerë dele, ndërsa autoritetet po përpiqen të gjejnë mënyrën e ndërhyrjes për t’i nxjerrë në siguri.

Përmbytje janë shënuar edhe në Shalës të Konispolit, ku lumi Pavlla ka dalë nga shtrati në zonën e urës së Vilës. Si pasojë, gjashtë fshatra të njësisë administrative Markat kanë mbetur të izoluar.

Strukturat e emergjencave civile po monitorojnë situatën, ndërsa rritja e mëtejshme e prurjeve mbetet një shqetësim për banorët dhe autoritetet lokale.