Policia e Durrësit ka finalizuar një tjetër aksion të gjerë kundër shpërndarjes së narkotikëve, duke çuar në pranga 12 persona dhe duke sekuestruar lëndë narkotike, armë të ftohta, pajisje elektronike dhe municion luftarak. Operacioni i koduar “CLEANING 3”, i ndjekur me metoda speciale të hetimit nga Seksioni për Hetimin e Narkotikëve në bashkëpunim me Prokurorinë e Durrësit, konsiderohet një prej goditjeve më të forta ndaj shpërndarjes së drogës pranë shkollave të qytetit.

Në pranga ka rënë edhe organizatori i dyshuar i grupit, shtetasi F. A., 30 vjeç, ndaj të cilit rëndojnë një sërë akuzash të tjera, përfshirë mbajtjen pa leje të armëve shpërthyese, kontrabandë mallrash, fshehje të ardhurash dhe mospagim taksash. Ai, së bashku me 11 të arrestuarit e tjerë, akuzohet për prodhim dhe shitje të lëndëve narkotike.

Gjatë operacionit, i cili vjen pas goditjeve të mëparshme “CLEANING 1” dhe “CLEANING 2”, policia zbuloi dhe dokumentoi veprimtarinë e një rrjeti të mirëorganizuar të shpërndarjes së drogës, që operonte kryesisht pranë gjimnazeve të qytetit.

Në cilësinë e provës materiale u sekuestruan:
• 180 doza kokainë (100 gramë)
• 620 doza marijuanë (1.25 kg)
• 2 peshore elektronike
• 16 celularë
• 3 thika
• një përforcues grushti
• fishekë luftarakë

Gjithashtu, u shpall në kërkim një tjetër i dyshuar, B. M., për të cilin vijon puna për lokalizimin dhe kapjen.

Sipas policisë, grupi ushtronte aktivitet të rrezikshëm kriminal, duke shpërndarë lëndë narkotike në zona të frekuentuara nga të rinjtë dhe pranë shkollave të mesme. Materialet i janë kaluar Prokurorisë së Durrësit për hetime të mëtejshme.