Dalja e lumit Seman nga shtrati ka shkaktuar dëme të mëdha në Bashkinë Dimal, ku qindra hektarë sera të mbjella me perime të stinës janë përmbytur. Më e goditura është zona e fshatit Goriçan, ku prej katër ditësh uji vijon të mbajë nën pushtet tokat bujqësore, duke shkatërruar prodhimin e fermerëve.

Sipas banorëve, dëmet arrijnë në miliona lekë. Mes tyre është edhe familja Goga, e kthyer nga Gjermania për të investuar në vendlindje. Por përmbytja nuk i kurseu as serrat e tyre.
Erigis Goga tregon se ishte në prag të vjeljes së domateve kur uji i Semanit u fut deri në një metër brenda serrës. Sot, pas qëndrimit të gjatë nën ujë, i gjithë prodhimi është kalbur.

Situata rrezikon edhe mbjelljet e sezonit të ardhshëm. Fermerët thonë se fidanët i kanë porositur, por toka është e pamundur të punohet: balta dhe lagështia e tepërt nuk lejojnë asnjë ndërhyrje për muajt në vijim.

Ata i bëjnë thirrje shtetit për ndihmë, pasi kursimet e tyre i kanë investuar në serra nga të cilat sot nuk përfitojnë asgjë.

Në territorin e Bashkisë Dimal, problemi kryesor mbeten tokat bujqësore ku uji largohet me shumë ngadalë për shkak të kanaleve kulluese të bllokuara. Në disa zona ato mungojnë plotësisht, duke shtuar përmasat e përmbytjes.

Ndërkohë, në fshatrat Çiflig dhe Arrëz, ku uji është tërhequr, banorët kanë nisur pastrimin e banesave dhe vlerësimin e dëmeve.