Bora e parë ka zbardhur majën e Bukanikut në Gjinar, duke sjellë pamjet e para të vjeshtës së vonë dhe paralajmërimet e para të dimrit në zonën turistike. Reshjet kanë qenë të lehta dhe, sipas autoriteteve, qarkullimi rrugor vijon normalisht pa asnjë problematikë.

Edhe zonat malore të Librazhdit janë veshur me një shtresë të hollë dëbore. Fshatrat Stërblev, Qarrishtë dhe Marat raportojnë reshjet e para, por situata në rrugë mbetet e qetë dhe e menaxhueshme.

Ndërkohë, reshje më të dendura janë regjistruar në majën e Bigllës dhe në Dardhë, si dhe përgjatë aksit Shtyllë–Mashkullorë, ku bora ka rënë në sasi më të konsiderueshme. Autoritetet po monitorojnë situatën në terren, ndërsa deri tani nuk ka raportime për rrëshqitje, bllokime apo vështirësi në qarkullim.

Bora e parë, megjithëse e lehtë, ka sjellë gjallërinë e parë të sezonit dimëror në zonat turistike të qarkut Elbasan, duke tërhequr vëmendjen e vizitorëve të hershëm dhe adhuruesve të natyrës.