Në Asamblenë e Unionit më të madh në botë të partive të qendrës së djathtë (CDI), e zhvilluar në Sao Paulo, Brazil, Kryetari i Partisë Demokratike, Sali Berisha, u zgjodh Zëvendëspresident i organizatës ndërsa u miratua rezoluta e pestë lidhur me situatën politike në Shqipëri.

Rezoluta ngre alarmin për regresin e thellë demokratik në vend, përqendrimin ekstrem të pushtetit në duart e qeverisë, shkrirjen parti–shtet dhe depërtimin e krimit të organizuar në institucionet publike. Dokumenti thekson se zgjedhjet e 11 majit, sipas raportit të OSBE/ODIHR, u karakterizuan nga keqpërdorim masiv i burimeve publike, blerje votash, intimidim dhe drejtësi selektive, duke cenuar garën e lirë dhe të ndershme.

CDI paralajmëron se kapja e shtetit, kontrolli mbi institucionet e drejtësisë, pengimi i komisioneve hetimore parlamentare dhe ndikimi i krimit në ekonomi e zgjedhje e afrojnë Shqipërinë me një model narko–autoritar, që paraqet rrezik serioz për sigurinë rajonale dhe procesin e zgjerimit të Bashkimit Evropian.

Rezoluta i bën thirrje BE-së dhe SHBA-ve që procesi i integrimit të Shqipërisë të kushtëzohet me progres të matshëm në sundimin e ligjit, luftën kundër korrupsionit dhe integritetin zgjedhor, si dhe kërkon vendosjen e sanksioneve të targetuara ndaj individëve të përfshirë në krim të organizuar dhe korrupsion, përkrahur nga mbështetja për krijimin e një qeverie teknike që garanton zgjedhje të besueshme.

CDI shpreh gjithashtu solidaritet me qytetarët shqiptarë dhe forcat demokratike që punojnë për rikthimin e pluralizmit, llogaridhënies dhe vlerave evropiane