Raporte të shumta po ngrenë pikëpyetje të mëdha mbi autorësinë e planit 28-pikësh për përfundimin e luftës në Ukrainë—një dokument që konsiderohet gjerësisht si i favorshëm për Rusinë, pasi përfshin disa nga kërkesat kyçe të Moskës.

Kontroversia shpërtheu pasi një grup senatorësh amerikanë deklaruan se senatori Marco Rubio u kishte thënë privatisht se plani nuk është propozim zyrtar i SHBA-ve dhe se ai nuk pasqyron pozicionin e Uashingtonit. Sipas tyre, sekretari i shtetit e kishte përshkruar dokumentin si një propozim të Rusisë, të cilin SHBA-së i ishte kërkuar t’ia përcillte Ukrainës për shqyrtim.

Senatori republikan Mike Rounds, anëtar i Komitetit të Inteligjencës, tha:

“Sekretari Rubio na telefonoi pasdite. Ai e bëri të qartë se ne jemi thjesht marrës të një propozimi që iu dorëzua një prej përfaqësuesve tanë. Nuk është rekomandimi ynë, nuk është plani ynë i paqes. Është një propozim që kemi marrë.”

Por pas kësaj deklarate, Marco Rubio reagoi ashpër, duke e mohuar versionin e senatorëve dhe duke insistuar se:

“Propozimi i paqes është autorësia e SHBA-ve. Ai ofrohet si një kuadër i fortë për negociatat në vazhdim. Bazohet në inpute nga pala ruse, por gjithashtu në inpute të mëparshme dhe të vazhdueshme nga Ukraina.”

Këto qëndrime të kundërta kanë shtuar konfuzionin rreth dokumentit, i cili pritet të ketë ndikim të drejtpërdrejtë në bisedimet e mundshme të paqes mes Kievit dhe Moskës.

Edhe Kryeministri i Polonisë, Donald Tusk—një nga mbështetësit më të fortë të Ukrainës në BE—ngriti pikëpyetje serioze mbi origjinën e planit.

“Do të ishte mirë të dihej saktësisht kush është autori i planit dhe ku është krijuar,” – deklaroi Tusk, duke theksuar se transparenca është e domosdoshme para se të nisë diskutimi mbi përmbajtjen e tij.

Ndërkohë, Departamenti i Shtetit nuk ka komentuar publikisht mbi mospërputhjet e deklaratave, duke lënë në hije një dokument që tashmë ka ndezur debat të fortë politik dhe diplomatik.