Hetimet për atentatin e 11 nëntorit në Rinas, ku u ekzekutuan Gilmando Dani dhe Muçi Shaljani, kanë nxjerrë në dritë të dhëna të rëndësishme mbi sfondin e kësaj ngjarjeje të rëndë kriminale. Edhe pse kanë kaluar dy javë nga krimi, autorët vijojnë të jenë në arrati dhe identiteti i tyre mbetet ende i paqartë.
Sipas burimeve nga grupi hetimor, dyshohet se për vrasjen e Gilmando Danit, i njohur si krahu i djathtë i Emiliano Shullazit, është paguar shuma rekord prej 5 milionë eurosh. Hetuesit mendojnë se pas ngjarjes qëndron një grup i specializuar vrasësish me pagesë, të rekrutuar posaçërisht për këtë atentat.
Burimet shtojnë se vrasësit nuk kanë vepruar në mënyrë të pavarur, por janë kontaktuar nga një ndërmjetës, i cili dyshohet se ka shërbyer si hallka lidhëse mes porositësve dhe ekzekutorëve. Hetimet po përqendrohen pikërisht tek identifikimi i këtij personi, që konsiderohet kyç për zbardhjen e plotë të skemës.
Ngjarja e rëndë, e ndodhur në një zonë të populluar pranë aeroportit ndërkombëtar, rrezikoi seriozisht edhe jetën e qytetarëve të tjerë. Përplasja e breshërive ndaj automjetit ku udhëtonin Dani dhe Shaljani shkaktoi një tronditje të madhe publike, ndërsa situata konsiderohet një precedent shqetësues për sigurinë.
Grupi hetimor vazhdon punën për identifikimin dhe kapjen e autorëve, teksa pista kryesore mbetet ajo e larjes së hesapeve mes grupeve kriminale.
