Reshjet e shiut të shoqëruara me erë të fortë kanë vijuar gjatë gjithë natës në territorin e Qarkut Shkodër, por pavarësisht kushteve të vështira atmosferike, autoritetet lokale raportojnë se deri në orët e para të mëngjesit nuk janë shënuar problematika serioze.

Bashkia Shkodër
Reshje intensive dhe erë me shpejtësi të lartë janë regjistruar gjatë natës. Administratorët e njësive administrative konfirmojnë se situata është nën kontroll, pa dëme në terren.

Bashkia Malësi e Madhe
Shiu ka rënë me intensitet të lartë, shpeshherë në formë shtrëngate, por nuk raportohet asnjë vështirësi apo dëm deri në mëngjes.

Bashkia Vau Dejës
Zona është përfshirë nga reshje të dendura dhe erë e fortë. Sipas administratorëve lokalë, nuk ka situata problematike.

Bashkia Pukë
Shiu ka vazhduar me intensitet të qëndrueshëm, por deri tani nuk janë evidentuar probleme në terren.

Bashkia Fushë-Arrëz
Reshjet e forta kanë qenë të pranishme gjatë gjithë natës. Në disa fshatra është regjistruar ndërprerje e energjisë elektrike, ndërsa në disa rrugë rurale ka prezencë uji, gurësh dhe dherash, kryesisht si pasojë e problemeve të ditëve të mëparshme. Nuk ka situata të reja të rënda.

Drejtoria Rajonale e Rrugëve Shkodër (DRV)
Qarkullimi automobilistik vijon normalisht në të gjithë qarkun, pa bllokime apo segmente të pakalueshme.

Autoritetet njoftojnë se monitorimi në terren vijon, ndërsa reshjet pritet të vazhdojnë edhe gjatë ditës.