Detaje të reja janë zbardhur nga operacioni i zhvilluar dy ditë më parë në fshatin Orosh të Mirditës, ku forcat speciale RENEA, Policia e Shkodrës dhe strukturat e Antiterrorit u përballën me dy persona të radikalizuar: Hamza (Erzen) Uka dhe Julian Cumraku.

Të dy kishin lëvizur nga zona e Kurbinit drejt Oroshit, një fshat thuajse i braktisur, duke dalë kështu nga mbikëqyrja e strukturave të sigurisë. Përmes përgjimeve telefonike u lokalizuan në një shtëpi të vetmuar, ku qëndronin të armatosur.

Kërcënime me armë dhe shtëpia e blinduar

Patrulla e parë e Policisë së Pukës, që shkoi për verifikim, u përball me kërcënim të menjëhershëm. Julian Cumraku, i cili po çante dru në oborr, sapo pa policët hyri brenda dhe së bashku me Ukën kërcënuan se do të qëllonin nëse nuk largoheshin.

Para mbërritjes së RENEA-s, dy radikalët blinduan shtëpinë duke mbyllur dritaret me dërrasa, batanije e deri me kapakë televizorësh të vjetër. Negociatorët e RENEA-s tentuan t’i bënin thirrje për dorëzim, por përgjigjja ishte një breshëri kallashnikovi nga brenda banesës.

Përfshirja e familjarëve dhe rrëfimi tronditës i vëllait

Në pamundësi për dialog, policia solli dajën e Cumrakut dhe vëllain e Hamza Ukës. Ky i fundit, duke hyrë nga pjesa e pasme e shtëpisë me frikë se mos qëllohej, tentoi dy herë t’i bindte, por pa rezultat.

Ai u shpreh i dorëzuar para policisë:

“Nuk kam çfarë të bëj më. Janë shumë të rrezikshëm, mund të më vrasin edhe mua.”

Gjatë bisedës, Erzen Uka i kishte thënë vëllait:

“Do luftojmë deri në fund.”

Dorëzimi pas thirrjes: “Mendo për djalin tënd”

Pas më shumë se 8 orësh negocim, ndërhyrja e tretë e vëllait rezultoi vendimtare. Ai i ka thënë Ukës:

“Mendo për djalin dhe familjen. Largoji xhindet.”

Pas kësaj, Uka dhe Cumraku hapën derën dhe u dorëzuan pa kushte, duke dalë të paarmatosur para forcave speciale që rrethonin zonën.

Arsenal armësh, granata dhe flamuri i ISIS

Forcat RENEA, pas dorëzimit, hynë në banesë dhe gjetën një sasi të madhe armatimi:
• 4 armë automatike
• 1 pistoletë “MiniBlow”
• 17 granata dore defensive
• Municion luftarak
• Kapsolla detonatorë elektrikë
• Një flamur të organizatës terroriste “ISIS”

Akuzat

Dy të arrestuarit do të hetohen nga Prokuroria dhe Policia e Shkodrës për:
• Mbajtje pa leje të armëve dhe municioneve shpërthyese
• Kundërshtim me armë ndaj Policisë së Shtetit
• Nxitje dhe propagandë për kryerjen e veprave me qëllime terroriste

Operacioni përfundoi pa viktima, për shkak të një kombinimi të forcës, profesionit dhe ndërhyrjes vendimtare të familjarëve, që shmangën një përplasje të përgjakshme në Orosh.