Presidenti i Shteteve të Bashkuara, Donald Trump, ka reaguar ashpër pas ngjarjes së rëndë të regjistruar afër Shtëpisë së Bardhë, ku dy anëtarë të Gardës Kombëtare u qëlluan dhe u plagosën rëndë nga një sulm me armë zjarri.

Në një deklaratë të publikuar në rrjetin e tij social “Truth”, presidenti shprehu mbështetje të plotë për Gardën Kombëtare dhe forcat e sigurisë, duke i cilësuar si njerëz të jashtëzakonshëm që i shërbejnë vendit me përkushtim.

“Zoti i bekoftë Gardën tonë Kombëtare të Madhe dhe të gjitha forcat ushtarake e të rendit. Unë, si President i Shteteve të Bashkuara, dhe çdo person pranë Zyrës së Presidencës, jemi me ju,” u shpreh Trump.

Duke dënuar ashpër sulmin, ai përdori tone të forta ndaj autorit të dyshuar:

“Kafsha që qëlloi dy pjesëtarët e Gardës Kombëtare, të cilët janë në gjendje kritike, është gjithashtu rëndë e plagosur. Pavarësisht kësaj, ai do të paguajë një çmim shumë të rëndë.”

Sipas autoriteteve të Uashingtonit, dy pjesëtarët e plagosur të Gardës Kombëtare ndodhen në gjendje kritike dhe janë të shtruar në dy spitale të ndryshme. Edhe autori i dyshuar raportohet të jetë i plagosur rëndë dhe aktualisht ndodhet në paraburgim nën mbikëqyrje të rreptë.

Të shtënat ndodhën vetëm një bllok larg Shtëpisë së Bardhë, ndërsa policia ka rrethuar zonën dhe po heton motivin e sulmit. Investigimi vijon në bashkëpunim mes autoriteteve lokale dhe agjencive federale.