Dy persona kanë rënë në prangat e Policisë së Shkodrës gjatë operacionit të koduar “CONTROL”, një goditje e koordinuar ndaj armëmbajtjes pa leje dhe veprimtarive narkotike. Arrestimet u kryen nga Komisariati i Policisë Vau i Dejës, me mbështetjen e forcave “Shqiponja”, pas informacioneve të siguruara në rrugë operative.

Shtetasi D. G., 34 vjeç, nga fshati Bushat, u kap në flagrancë në një lokal ndërsa mbante me vete një armë zjarri pistoletë dhe municion luftarak. Ai akuzohet për veprën penale “Mbajtja pa leje dhe prodhimi i armëve, armëve shpërthyese dhe i municionit”.

Ndërsa 29-vjeçari J. T., banues në fshatin Paçram, u ndalua gjatë kontrollit të automjetit me të cilin qarkullonte. Gjatë kontrollit fizik, policia i gjeti një sasi lënde të dyshuar narkotike kanabis, duke e arrestuar për veprën penale “Prodhimi dhe shitja e narkotikëve”.

Policia njofton se gjatë operacionit u sekuestruan arma e zjarrit, municion luftarak dhe lënda narkotike.
Materialet iu referuan Prokurorisë së Shkodrës për vijimin e hetimeve.

Operacioni “CONTROL” është pjesë e masave për rritjen e sigurisë dhe parandalimin e aktivitetit kriminal në zonë.