Ministri i Mbrojtjes, Pirro Vengu, ka uruar sot Ditën e Pavarësisë së Shqipërisë, duke ndarë një videomesazh të veçantë nga efektivët e Forcave të Armatosura që shërbejnë në Kosovë. Mesazhet e tyre përcollën krenarinë dhe përkushtimin e trupave shqiptare, duke rikujtuar sakrificën dhe vlerat që bashkojnë kombin.

“Në këtë detyrë dhe angazhim tonin, përforcojmë vetëdijen dhe vendosmërinë e sakrificës për të çuar përpara vlerat e kombit shqiptar. Jemi këtu për t’i dalë zot atdheut tonë dhe për të nderuar gjakun e derdhur të atyre që ranë për lirinë e tokës sonë. Gëzuar Ditën e Pavarësisë dhe Ditën e Çlirimit”, u shpreh një pjesëtar i FA në Kosovë.

Një tjetër pjesëtare shtoi: “Gëzuar festat e nëntorit familjet tona, motra dhe vëllezër shqiptarë kudo ndodhen. Gëzuar ushtarakë dhe çdo anëtar i FA që jetën ia dedikon kësaj uniforme.”

Sot, shqiptarët brenda dhe jashtë vendit festojnë 113-vjetorin e shpalljes së Pavarësisë, një ditë simbol që nis nga ngritja e flamurit të Skënderbeut në Krujë më 28 nëntor 1443 dhe kulmon me nënshkrimin e Aktit të Pavarësisë më 1912 në Vlorë, nën drejtimin e Ismail Qemalit.

Që prej vitit 2017, 28 Nëntori shënohet si ditë pushimi zyrtar edhe në Kosovë, si shenjë nderimi për vlerat dhe traditat e përbashkëta të kombit shqiptar. Mesazhet e efektivëve të FA në Kosovë rikujtojnë qëndresën, unitetin dhe krenarinë kombëtare që kjo datë simbolizon.