Një ngjarje e rëndë ka tronditur Austrinë dhe Slloveninë, pas gjetjes së trupit të pajetë të influencueses 31-vjeçare, Stefanie Pieper, e zhdukur prej gati një jave nga Graz. Trupi u zbulua në një zonë pyjore pranë Mariborit në Slloveni, pas deklarimeve të ish-partnerit të saj, i cili tashmë konsiderohet krye-dyshimtari i ngjarjes.

Sipas raportimeve, ai ka pranuar përfshirjen e tij në zhdukjen dhe vdekjen e influencueses, duke treguar vendndodhjen e trupit. Hetimet kanë çuar në arrestimin e dy bashkëpunëtorëve të dyshuar, vëllait dhe njerkut të tij, që akuzohen për tentativë manipulimi të provave dhe kanë refuzuar të japin dëshmi.

Autoritetet austriake dhe sllovene po punojnë ngushtë për të rindërtuar plotësisht ngjarjen dhe pritet të publikojnë detaje të reja gjatë ditëve në vijim. Ngjarja ka tronditur komunitetin lokal dhe ndjekësit e influencueses, duke ngritur shqetësime për sigurinë dhe kontrollin mbi marrëdhëniet private dhe dhunën në familje.

Në fokus mbetet ish-partneri i Pieper, i cili është ekstraduar në Austri dhe po bashkëpunon me hetuesit. Hetimet pritet të japin përgjigje për motivet dhe mënyrën e kryerjes së krimit, ndërsa policia paralajmëron masa të mëtejshme ndaj të dyshuarve të tjerë.