Deputeti i Partisë Demokratike, Tritan Shehu, ka kërkuar në Kuvend ndalimin e substancës fostoksinë, duke e cilësuar si një nga shkaktarët e vetëvrasjeve në vend.

Gjatë fjalës së tij, Shehu përmendi rastin e një 15-vjeçari që humbi jetën në Elbasan pas marrjes së kësaj substance. Ai tha se fostoksina duhet të ndalohet, siç ndodh në shumicën e vendeve të botës, dhe të mos jetë e qasshme në rrugë ose kioska.

“E dini ju që një 15-vjeçar ka ndërruar jetë në Elbasan sepse ka marrë fostoksinë. E kam ngritur 100 herë, zoti ministër, që kjo substancë toksike, vdekjeprurëse dhe ndjellëse e vetëvrasjeve, të hiqet nga farmakopeja bujqësore. Të ndalohet siç është bërë në shumicën dërrmuese të botës,” tha Shehu.

Ai shtoi se ka shumë substanca alternative jo të dëmshme që mund të përdoren, duke nënvizuar nevojën për rregullim të menjëhershëm ligjor.