Deputeti i Partisë Demokratike, Bujar Leskaj, ka kritikuar sot në Kuvend situatën e përmbytjeve në Vlorë, duke e cilësuar qytetin si një “pasqyrë të asaj që ndodh me të gjitha qytetet e Shqipërisë”.
Sipas Leskaj, rrjeti i kanalizimeve është i vjetërsuar dhe nuk mirëmbahen si duhet investimet, disa prej të cilave arrijnë miliona euro. Ai përmendi një rast konkret: më 25 gusht u dhanë 38 milionë lekë për mirëmbajtjen e hidorvorit, por nuk ka transparencë se ku kanë shkuar këto fonde.
“Vlora është pasqyra e çfarë ndodh me të gjitha qytetet e Shqipërisë.
Rrjeti i kanalizimeve është i vjetërsuar dhe jo i mirëmbajtur. Investimet me miliona euro në fakt janë abuzime.
Janë kryer pa standard e studime të mirëfillta, pa studim Teknik. Lagje të tëra të Vlorës përmbytjen në çdo reshje e kohë.
Qyteti i Vlorës po mbrohet nga 2 pompa të vogla se dhe tenderi që u bë përpara disa muajsh për pompat, përsëri u abuzua dhe u bë një tender korruptiv.
Në 25 gusht u dhanë 38 milionë lekë për mirëmbajtjen e hidorvorit. Kanë deklaruar se janë planifikuar 3 miliardë lekë investime për sistemin kullues.
Ku kanë shkuar këto lekë, Këto tenderime përgjithësisht, nuk shoqërohen me asnjë analizë teknike të mirëfilltë e as plan. Këto futen në të njëjtën spirale.
Përmbytjet e këtij nëntori, ishin dhe janë pasojë e papërgjegjshmërisë së pushtetit qendror dhe vendor. Kjo është goditje e rëndë për ekonominë dhe turizmin.
Vlora është në ndryshmin nga Berati, nuk e kuptoj sesi të jetë qyteti nën ujë dhe të jetë… ndoshta dhe këta duan të kalojnë si Venecia.
Askush nuk jep llogari për përmbytjet. Një pjesë e qytetarëve të përmbytur nuk kanë marrë dëmshpërblimin real.
Sorollatja e qëllimshme nga bashkia dhe emergjencat civile si dhe ndërhyrje patronazhistësh. Mbi të gjitha nuk ka përgjegjësi dhe përgjegjshmëri. Juve ju duket si fjalë e huaj kjo përgjegjshmëri e llogaridhënie, ju provokon”, tha Bujar Leskaj.
Ky reagim vjen pas përmbytjeve që goditën lagjet e Vlorës gjatë reshjeve të fundit, duke nxitur debate mbi menaxhimin e fondeve publike dhe përgjegjësinë e autoriteteve lokale dhe qendrore.
