Shtëpia italiane e modës “Prada”, e themeluar në vitin 1913 në Milano nga Mario Prada, ka njoftuar zyrtarisht blerjen e kompanisë rivale “Versace”. Marrëveshja, e vlerësuar më parë në 1,25 miliardë euro, shënon një nga konsolidimet më të mëdha në industrinë e modës luksoze italiane.

Prada, portofoli i së cilës përfshin gjithashtu markat e njohura “Miu Miu” dhe “Church’s”, ka blerë të gjitha aksionet e “Versace” të mbajtura nga kompania amerikane e veshjeve luksoze “Capri Holdings”, pas marrjes së të gjitha miratimeve rregullatore. Komisioni Evropian në Bruksel dha miratimin për blerjen në shtator.

Çmimi final i blerjes së kompanisë “Versace”, e themeluar në vitin 1978, është nën 1,5 miliardë euro. Planet e Prada-s për këtë marrëveshje u bënë publike në prill të këtij viti, pas disa muajsh spekulimesh në industrinë e modës. Sipas gazetës “Corriere della Sera”, disa pengesa rregullatore dhe strategjike duhej të kapërceheshin përpara se dy shtëpitë e mëdha italiane të modës të bashkoheshin.

Ky hap konsolidon pozitën e Prada-s si një nga liderët kryesorë të modës luksoze në nivel global dhe shënon një moment historik për markat italiane në industrinë e luksit.