Imami Ahmed Kalaja ka reaguar ashpër në rrjetet sociale, duke akuzuar mediat se kanë transmetuar një version të cunguar të ngjarjes lidhur me sjelljen e trupit të këngëtarit të ndjerë Shpat Kasapi nga Italia në Tetovë.

Reagimi i tij vjen vetëm pak ditë pasi familja Kasapi falënderoi publikisht ish-futbollistin Igli Tare, të cilin e cilësuan si personin që përshpejtoi procedurat burokratike në Itali, duke mundësuar transportimin dhe varrimin e artistit në kohë rekord.

Por sipas Kalasë, roli kryesor i ka takuar dikujt tjetër. Ai pretendon se pikërisht Mariglen Shehaj ka qenë personi që është marrë me të gjitha shërbimet dhe ka mbuluar shpenzimet financiare për transportin e trupit.

“Mediat nuk thanë të vërtetën kryesore se: Mariglen Shehaj, babai i Amarit, vëllai ynë, është marrë me të gjitha shërbimet para dhe pas vdekjes, si edhe me transportimin e tij për në Tetovë. Zoti e shpërbleftë,” shkruan imami.

Kalaja shton se nuk mohon mundësinë që të kenë ekzistuar kontribues të tjerë në aspektet procedurale, por thekson se “të mirat materiale (shpenzimet) janë hedhur nga vëllai në fjalë”.

Reagimi i tij ka hapur debat të ri në rrjetet sociale, ku shumë përdorues kërkojnë transparencë të plotë mbi kontributet dhe rolin e secilit në këtë proces të ndjeshëm.