Shteti amerikan i Arizonës ka ngritur një padi të fuqishme kundër platformës kineze të shitjeve online Temu dhe kompanisë mëmë PDD Holdings Inc, duke i akuzuar për mbledhje të paligjshme të të dhënave të konsumatorëve dhe mashtrim të përdoruesve mbi cilësinë e produkteve.

Prokurori i Përgjithshëm i Arizonës, Chris Mays, deklaroi se aplikacioni Temu “mashtron klientët” dhe mbledh një sasi “tronditëse” të të dhënave të ndjeshme, përfshirë vendndodhjet GPS dhe informacione të tjera nga pajisjet celulare, pa pëlqimin e përdoruesve. Sipas tij, mënyra se si funksionon aplikacioni përbën një rrezik serioz për privatësinë dhe sigurinë e qytetarëve.

“Mund të zbulojë çdo vend ku shkoni — te mjeku, në bibliotekën publike, në një ngjarje politike apo në shtëpitë e miqve tuaj,” u shpreh Mays, duke e cilësuar rastin si “ndoshta shkeljen më serioze të Aktit të Mashtrimit të Konsumatorit të Arizonës që kam parë ndonjëherë”.

Padia ngre shqetësime edhe mbi juridiksionin e kompanisë, pasi Temu operon nën legjislacionin kinez, i cili mund të kërkojë dorëzimin e të dhënave të përdoruesve te qeveria në Pekin. Prokurorët pretendojnë gjithashtu se kodi i aplikacionit është krijuar për të shmangur hetimet e sigurisë në SHBA.

Mays shtoi se shteti synon të mbrojë bizneset vendase nga “kopjimi i lëkurës”, duke akuzuar Temu për shkelje të pronësisë intelektuale, madje edhe ndaj Universitetit Shtetëror të Arizonës.

Nga ana tjetër, Temu ka mohuar të gjitha akuzat.

Kjo padi vjen në vijim të veprimeve të ngjashme ligjore të ndërmarra më parë në Kentucky, Nebraska dhe Arkansas, ku autoritetet kanë ngritur shqetësime të ngjashme lidhur me praktikat e aplikacionit kinez.