Autoritetet qipriote dhe izraelite janë vënë në gatishmëri të lartë pas zhdukjes së një jahti izraelit në zonën detare jugore të Qipros, ndërsa rajoni është përfshirë nga stuhia e fuqishme “Byron”.

Sipas burimeve izraelite, pesë persona ndodheshin në bord dhe fati i tyre mbetet i panjohur.

Jahti ishte nisur të dielën nga porti i Ashdodit me destinacion Qipron. Komunikimi me anijen është humbur pak para se t’i afrohej bregdetit qipriot, në një zonë tashmë të goditur nga moti i keq.

Autoritetet e Marinës Tregtare të Izraelit dhe shërbimet detare të Qipros po bashkëpunojnë ngushtë. Anije të Republikës së Qipros janë dërguar në det për kërkime, në vendin ku jahti është parë për herë të fundit.

Operacioni vijon në kushte të vështira atmosferike, ndërsa shpresat për gjetjen e pesë personave ende gjallë mbeten të varura nga situata e motit në orët e ardhshme.