Presidenti ukrainas, Volodymyr Zelensky, ka njoftuar se Kievi dhe Uashingtoni kanë përgatitur disa dokumente draft me rëndësi kyçe, të cilat synojnë të sigurojnë një zgjidhje afatgjatë për përfundimin e luftës me Rusinë.

Sipas raportimit të Kyiv Post, këto dokumente trajtojnë çështje thelbësore, përfshirë garancitë e sigurisë, rindërtimin e Ukrainës dhe kuadrin e përgjithshëm të negociatave për paqe. Zelensky theksoi se, megjithëse është shënuar përparim i ndjeshëm, ende ekziston një hendek mes asaj që është hedhur në letër dhe situatës reale në terren.

Sekretari i Këshillit të Sigurisë Kombëtare dhe Mbrojtjes, Rustem Umerov, së bashku me shefin e Shtabit të Përgjithshëm, Andrij Hnatov, i raportuan presidentit pas takimeve me përfaqësuesit amerikanë se puna mbi dokumentet është përmbyllur dhe ato janë gati. “Drafte janë ndërtuar për të garantuar një përfundim real të luftës dhe për të penguar çdo agresion të ri rus”, u shpreh Zelensky.

Presidenti shtoi se angazhimi diplomatik dhe diskutimet në arenën ndërkombëtare do të vijojnë, me synimin për të arritur një marrëveshje të qëndrueshme. Dokumentet janë pjesë e përpjekjeve për të vendosur një armëpushim afatgjatë dhe për të adresuar pikëpamjet e ndryshme të palëve lidhur me kufijtë, garancitë e sigurisë dhe kushtet e paqes.