Zvicër, tragedia në Crans-Montana: Dëshmia e një studenti italian që ndihmoi viktimat e zjarrit fatal në bar

Crans-Montana – Pak pas orës 01:30 të mëngjesit të Vitit të Ri, një zjarr i fuqishëm përfshiu barin “Le Constellation” në resortin zviceran të skive Crans-Montana, duke shkaktuar mbi 47 viktima dhe 115 të plagosur.

Dëshmia e 19-vjeçarit italian Gianni, student i inxhinierisë mekanike në Gjenevë, hedh dritë mbi kaosin që përjetuan të pranishmit. I riu rrëfen se mori vesh ngjarjen nga një shoqe e tij që mbërriti aty pak minuta pas shpërthimit dhe menjëherë kuptoi seriozitetin e situatës. “Njerëzit ishin shtrirë përtokë, të plagosur dhe të djegur,” tregon ai, duke shtuar se ka ndihmuar në shpëtimin e viktimave me mjete improvizuese nga lokali.

Operacionet e shpëtimit vazhduan deri në orën 05:00, në temperatura deri në –11°C. Gianni pohon se adrenalina e mbajti gjallë gjatë gjithë natës, por shpreh zhgënjim për mungesën e mbështetjes psikologjike dhe mjekësore pas ngjarjes. “I vetmi person që më foli ishte një oficer policie i cili më kërkoi të largohesha,” shprehet ai.

Zjarrfikësit dhe ekipet mjekësore e përshkruan ngjarjen si një nga më të rëndat e dekadave në zonë. Hetimet për shkaqet e tragjedisë vijojnë ende, ndërsa komuniteti lokal dhe autoritetet po përpiqen të menaxhojnë pasojat e një nate që do të mbahet mend për përmasat e saj tragjike.