Dove Cameron dhe Damiano David, këngëtari i grupit italian Måneskin, janë fejuar pas dy vitesh lidhje. Lajmin e bukur e ka konfirmuar vetë aktorja dhe këngëtarja amerikane përmes një postimi në Instagram më 3 janar.
Në foton e publikuar, Cameron shfaqet duke mbajtur një unazë diamanti, ndërsa çifti shihet i përqafuar dhe i lumtur. “Pjesa ime e preferuar e të qenit gjallë”, ka shkruar ajo krahas imazhit, duke shtuar edhe urimin për Vitin e Ri.
Thashethemet për një fejesë kishin nisur që në fund të tetorit, kur Dove Cameron u fotografua me një unazë të madhe në dorë gjatë një shëtitjeje me Damianon në Sydney të Australisë. Konfirmimi zyrtar erdhi vetëm pak kohë pasi çifti festoi përvjetorin e dytë të lidhjes së tyre.
“Dy vitet më të mira të jetës sime”, shkroi Cameron në një postim më 9 tetor, duke shprehur hapur dashurinë për partnerin e saj dhe duke e cilësuar jetën më të bukur që prej se janë bashkë. Nga ana e tij, Damiano David e përshkroi marrëdhënien e tyre si “pjesën më të mirë të të qenit gjallë”.
Dove Cameron dhe Damiano David u njohën për herë të parë në MTV Video Music Awards 2022, ku të dy ishin të nominuar për çmimin “Artisti më i Mirë i Ri”. Që prej asaj kohe, çifti ka qenë shpesh në qendër të vëmendjes mediatike, duke u kthyer në një nga dyshet më të përfolura të botës së showbiz-it.
