Komiteti Teknik i Ekspertëve, në mbledhjen e kësaj të hëne vendosi që masat e vendosura në vend të mos ndryshojnë, edhe pas konfirmimit zyrtar se në vendin tonë qarkullon varianti indian i Covid-19, i njohur si ‘Delta’.

Zv. ministrja e Shëndetësisë, Mira Rakacolli, tha se personat e infektuar nuk kanë bërë asnjë dozë të vaksinës, e kjo shihet si shkaku kryesor i shtimit të numrit të rasteve. Megjithatë, ajo theksoi se situata në vend aktualisht është e qëndrueshme.

“Komiteti teknik mendon që pavarësisht se në Shqipëri është i vërtetuar dyshimi i fortë për prezencën e variantit ‘Delta’ mbrojtja është njësoj e niveli i masave s’ka asnjë arsye që të ndryshojë.

“Siç u bë i qartë, u vu re që ka një numër në rritje të rasteve. Shtrimi në spital mbetet në nivele të qëndrueshme, ajo çka është më e rëndësishme është që numri i rasteve të shtruara të sëmurëve rëndë, janë persona që s’janë vaksinuar. Rastet po rriten në komunitetin që mbeten të pavaksinuar.

Duke u mbështetur në këtë situatë, KT mendon që edhe pse në Shqipëri është vërtetuar prezenca e variantit Delta mbrojtja është njësoj dhe niveli i masave nuk ndryshojnë. Masat do të jenë po të njëjta”.

Mbrojtja prej këtij varianti është e njëtë si me variantet e reja, do mbrohemi nëse do zbatojmë ato masa që kanë përcaktuar ekspertët, si mbajtja e maskave, që tashmë fatkeqësisht nuk po vihet re, sic janë qendrat tregtare, aeroortet, ndalimi i grumbullimeve dhe vazhdimi i orës policore nga ora 24:00 deri në 6 të mëngjesit, duke shoqëruar me orarin e muzikës deri në orën 23: 00. E vetmja mënyrë që kemi për t’u mbrojtur edhe nga varianti i ri është vaksinimi”, tha Rakacolli.