Gjykata e Lartë e Venezuelës ka urdhëruar zëvendëspresidenten Delcy Rodríguez të marrë përkohësisht detyrat dhe kompetencat e presidentit të Republikës, pas arrestimit të Nicolás Maduro-s nga Shtetet e Bashkuara të Amerikës.
Vendimi u bë publik vonë të shtunën, në orët e para të së dielës, me arsyetimin se Maduro ndodhet në një “paaftësi thelbësore dhe të përkohshme për të ushtruar funksionet e tij”. Urdhri u lexua nga gjyqtarja Tania D’Amelio gjatë një seance të transmetuar drejtpërdrejt nga televizioni shtetëror VTV.
Sipas vendimit, Delcy Rodríguez do të ushtrojë, si presidente në detyrë, të gjitha pushtetet, detyrat dhe kompetencat që rrjedhin nga posti i kreut të shtetit, me qëllim garantimin e vazhdimësisë administrative dhe mbrojtjen e rendit kushtetues të vendit.
Kushtetuta e Venezuelës parashikon që, në rast mungese të përkohshme ose përfundimtare të presidentit, zëvendëspresidenti merr automatikisht drejtimin e shtetit.
Ndërkohë, arrestimi i Nicolás Maduro-s u krye një ditë më parë nga forcat amerikane, në kuadër të një operacioni të urdhëruar nga presidenti i SHBA-së, Donald Trump. Maduro përballet me akuza të rënda, përfshirë komplot për narkoterrorizëm, trafik dhe importim kokaine në Shtetet e Bashkuara, përdorim dhe posedim të armëve të rënda gjatë veprimtarive kriminale, si dhe konfiskim pasurie.
Zhvillimet kanë shkaktuar tronditje të forta politike brenda dhe jashtë Venezuelës, ndërsa pritet që ditët në vijim të jenë vendimtare për stabilitetin institucional dhe drejtimin e ardhshëm të vendit.
