Partia Demokratike ka zhvilluar sot foltoren e parë për vitin 2026, duke mbledhur qytetarë përballë godinës së qeverisë. E quajtur edhe Kuvendi i qytetarëve dhe deputetëve, foltorja kërkon dorëheqjen e kryeministrit Edi Rama për të hapur rrugën një qeverie teknike dhe zgjedhjeve të lira e të ndershme.

Në ngjarje mori pjesë kryedemokrati Sali Berisha, i shoqëruar nga deputetë të PD dhe të opozitës, ndërsa fjalën e mori i pari ligjvënësi demokrat Luçiano Boçi. Ai akuzoi kryeministrin dhe kabinetin e tij për keqqeverisje dhe korrupsion, duke theksuar se një grup i vogël individësh përfiton nga pushteti, ndërsa qytetarët vuajnë pasojat ekonomike dhe sociale.

Boçi shprehu se për shkak të korrupsionit dhe mënyrës së qeverisjes, Rama “meriton fatin e Maduros”, duke bërë paralelizëm me zhvillimet politike në Venezuelë. Ai shtoi se qytetarët ndihen të tradhtuar nga qeverisja, përballen me varfëri dhe përjashtim social, ndërsa pushtetarët jetojnë në luks dhe indiferencë.

“Është e vërteta e atyre qytetarëve që shohin para syve talljen që i bën Rama me shpurën e tij, me pensione qesharake, me tigra, me satelitë orbitalë dhe parlament banal. Ai ka ndërtuar mbretërinë e së keqes, si parajsën e vet dhe ferrin e qytetarëve,” tha Boçi, duke i bërë thirrje qytetarëve për llogaridhënie dhe për të mbrojtur të vërtetat e tyre.