Reshjet intensive të shiut kanë shkaktuar probleme serioze në fshatin Vajzë të bashkisë Selenicë, ku si pasojë e motit të keq ka rrëshqitur rruga kryesore dhe janë dëmtuar dy banesa.

Rruga është bërë e pakalueshme për automjetet, duke vështirësuar qarkullimin, ndërsa fatmirësisht nuk raportohet për persona të lënduar. Policia ndodhet në terren dhe po monitoron situatën, pasi kjo rrugë shërben si lidhje për disa fshatra të njësisë administrative Sevaster.

Ndërkohë, situata paraqitet e rënduar edhe për shkak të daljes nga shtrati të lumit Vjosë. Uji ka përmbytur zonën e pazarit të gjësë së gjallë, ndërsa niveli i tij ka arritur rreth 7 metra. Për arsye sigurie, autoritetet kanë njoftuar banorët e zonave të rrezikuara dhe kanë evakuuar paraprakisht 12 banesa.

Sipas strukturave përgjegjëse, prurjet në lumin Vjosë vijojnë të jenë të larta dhe situata po mbahet nën monitorim të vazhdueshëm.