Për shkak të inerteve dhe dherave që kanë rënë në aksin rrugor Qafë Plloçë – Qukës, qarkullimi i automjeteve në këtë segment është mbyllur përkohësisht. Vendimi është marrë pas informacioneve më të fundit nga autoritetet, me qëllim shmangien e rrezikut për përdoruesit e rrugës, veçanërisht pas një aksidenti të ndodhur paraditen e sotme në këtë zonë.

Policia e Qarkullimit Rrugor e Korçës dhe ajo e Elbasanit kanë ndërhyrë menjëherë, duke orientuar mjetet drejt rrugës së vjetër. Patrulla policie janë vendosur në hyrje të Qafë Plloçës dhe në hyrje të Qukësit, për të mos lejuar hyrjen e automjeteve në aksin e ri, i cili konsiderohet aktualisht i rrezikshëm për qarkullim.

Sipas autoriteteve, aksi do të qëndrojë i mbyllur deri në momentin kur firma kontraktore të përfundojë pastrimin e plotë të dherave dhe inerteve që kanë rënë në rrugë, si dhe derisa të garantohet se nuk ekziston më rrezik për lëvizjen e mjeteve. Firma kontraktore ndodhet edhe në këto momente në terren, ku po kryen ndërhyrjet e nevojshme, ndërsa ende nuk dihet se sa do të zgjasë bllokimi i qarkullimit në këtë segment rrugor.