Hetimet për ekzekutimin e biznesmenit Mondi Mëhalla kanë nxjerrë në pah një sërë mospërputhjesh të forta në dëshminë e ish-ortakut të tij, Xhino Ago, duke e vendosur këtë të fundit në qendër të vëmendjes së grupit hetues. Prokuroria po analizon me detaje lëvizjet, kontaktet dhe deklarimet e tij në orët kritike para krimit, të cilat sipas hetuesve ngrenë dyshime serioze për bashkëpunim dhe planifikim të atentatit.

Fokusi kryesor i hetimit mbetet automjeti tip “Audi” A4 me ngjyrë të zezë, i përdorur në vrasje dhe që rezulton në posedim të Xhino Agos. Përgjimet telefonike, kontrollet në banesa dhe analizimi i pamjeve filmike kanë zbuluar një sërë paqartësish kohore dhe kontradiktash mes asaj që Ago ka deklaruar dhe fakteve të administruara nga hetuesit, si edhe dëshmive të familjarëve të tij.

Sipas dokumentarit hetimor, një element kyç është dëshmia e Rolando Gjonit, i cili deklaron se pasi u largua nga vendi i takimit me miqtë e Armando Kolës, nuk e pa më automjetin “Audi” A4, përveç momentit kur ai u raportua si i përfshirë në vrasjen e Mondi Mëhallës, vetëm 48 orë më pas. Ky fakt ka forcuar dyshimet se makina ka qenë nën përdorimin e personave të përfshirë në krim.

Pas identifikimit të personave të dyshuar, me urdhër gjykate u vendos përgjimi i tyre dhe u ushtruan kontrolle në disa banesa, mes tyre edhe ajo e Xhino Agos. Ky i fundit rezulton se më herët kishte qenë ortak me Mondi Mëhallën në një shoqëri taksish, por më pas rrugët e tyre u ndanë, ndërsa viktima kishte hapur një biznes të ngjashëm privat.

Gjatë marrjes në pyetje si person që kishte dijeni për vrasjen, Xhino Ago deklaroi se më 30 nëntor 2025, rreth orës 09:00, ishte larguar nga banesa e tij në Tiranë me një automjet “Hyundai”, në pronësi të një kompanie të një miku, dhe kishte udhëtuar drejt Elbasanit, në zyrat e kompanisë së tij të taksive “EL Taksi”, pranë karburantit “Xhaxhi Oil”. Ai mohoi kategorikisht çdo konflikt me Mondi Mëhallën, duke pretenduar se orët para krimit ishin takuar dhe kishin pirë kafe së bashku, madje kishin planifikuar edhe një takim tjetër në mbrëmje.

Sipas dëshmisë së tij, pas kafesë ata kishin qëndruar së bashku deri rreth orës 13:00, duke lëvizur në këmbë rreth ambientit të karburantit dhe magazinës, pa praninë e personave të tjerë. Më pas, Ago tha se nuk ishin takuar më fizikisht, por kishin komunikuar përmes video-thirrjeve në WhatsApp gjatë pasdites. Ai deklaroi se rreth orës 15:45, Mondi Mëhalla i kishte thënë se po kthehej nga Kavaja dhe se për 20 minuta do të ishte në Elbasan.

Në një tjetër komunikim, Ago pretendon se e kishte ftuar Mëhallën të udhëtonin bashkë drejt Tiranës, pasi ai do të shoqëronte të fejuarën e tij. Fillimisht, sipas tij, Mëhalla kishte pranuar, por më pas kishte ndryshuar mendje, pa dhënë ndonjë arsye konkrete. Kjo pikë, sipas hetuesve, përbën një nga boshllëqet kryesore të rrëfimit të tij.

Kontradiktat thellohen më tej kur Ago shpjegon se pasi përcolli të fejuarën në Tiranë, ai u kthye sërish në Elbasan dhe shkoi te zyrat pranë karburantit rreth orës 18:45, pra afro një orë e 45 minuta para se Mondi Mëhalla të qëllohej për vdekje në parkingun e po këtij karburanti, rreth orës 20:30. Ai deklaron se tentoi disa herë ta telefononte viktimën, por nuk mori përgjigje. Për hetuesit, kjo krijon një mospërputhje të rëndë kohore, pasi gjatë këtij intervali Mëhalla do të kishte pasur mundësi të reagonte ose të kthente telefonatat.

Vetë Ago ka dhënë versione të ndryshme për orarin, duke thënë fillimisht se kishte qenë rreth orës 18:45, e më pas duke e korrigjuar në “18:00 e pak”, pa qenë i saktë. Pikërisht këto pasaktësi, të shoqëruara me faktin se automjeti i tij rezulton i përfshirë në krim, kanë shtyrë grupin hetues drejt pistës se Xhino Ago mund të ketë pasur rol më aktiv sesa thjesht një dëshmitar periferik.

Hetimet vijojnë me analizimin e përgjimeve, lëvizjeve të automjetit “Audi” dhe kontakteve telefonike, ndërsa autoritetet nuk përjashtojnë mundësinë që vrasja e Mondi Mëhallës të ketë qenë e planifikuar me bashkëpunim nga persona të afërt me viktimën.