Arben Ahmetaj ka bërë të qartë se kthimi i tij në Shqipëri nuk do të ndodhë deri në momentin kur, sipas tij, drejtësia të funksionojë pa ndikim politik dhe Edi Rama të mos jetë më kryeministër.

Në një deklaratë të fortë, Ahmetaj akuzoi kryeministrin për ndikim në drejtësi dhe për degradimin e shoqërisë shqiptare:

“Paraja e drogës është nëna e të gjitha të këqijave në Shqipëri. Ajo ka deformuar ekonominë, shoqërinë, kulturën dhe politikën, dhe ka masakruar klasën e mesme. Kjo është Shqipëria e frikës, Shqipëria kartel droge, Shqipëria e Edi Ramës.”

Në një intervistë me Çim Pekën, ai sqaroi kushtet e kthimit të tij:

“Kur drejtësia të çlirohet nga kthetrat e kreut të organizatës… kur drejtësia të ketë një fytyrë humane, atëherë do vija dhe do përballesha me drejtësinë, dhe me atë, me kreun e organizatës, që ka punuar për të më zeruar gjithë jetën time dhe për të më çuar në burg.”

Ahmetaj theksoi gjithashtu se ka prova dhe dëshmi që mbështesin pretendimet e tij:

“Unë i di të vërtetat. Kam parë SMS të kreut të organizatës, ku dikush i thotë ‘po ti na premtove që do ta shkrije, pse e bëre zëvendëskryeministër?’ E kam të ndarë këtë me një nga ish-kolegët e mi.”

Ai theksoi se kthimi i tij është i lidhur drejtpërdrejt me çlirimin e drejtësisë nga ndikimi politik dhe jo me ndonjë periudhë tjetër.

Kjo deklaratë rikthen në vëmendje tensionet politike dhe akuzat për ndikim të paligjshëm në sistemin e drejtësisë, duke hapur një debat të ri mbi qasjen e zyrtarëve dhe ish-zyrtarëve shqiptarë ndaj institucioneve të drejtësisë.