Gjatë orëve të natës në qarkun e Korçës nuk janë raportuar situata të reja problematike. Autoritetet konfirmojnë se gjendja paraqitet e qëndrueshme dhe vijon të jetë nën monitorim të vazhdueshëm nga të gjitha strukturat përkatëse.

Bashkia Maliq
Po vijon forcimi i argjinaturës së lumit Devoll, si masë parandaluese ndaj rritjes së prurjeve. Paralelisht, ekipet janë angazhuar në pastrimin e dherave dhe inerteve në rrugën e fshatit Mesmal, për të garantuar qarkullimin normal të mjeteve.

Bashkia Pogradec
Kanë nisur punimet në rrugën e fshatit Dunicë, në Njësinë Administrative Trebinjë. Gjithashtu, ka filluar hapja e rrugës për pesë fshatra të bllokuar në Njësinë Administrative Dardhas, në bashkëpunim mes bashkive Devoll dhe Pogradec. Dëmet e shkaktuara janë në proces vlerësimi, ndërsa nuk raportohen problematika të tjera në territor.

ARRSH – Drejtoria Qendër–Lindje
Të gjitha akset rrugore në qark janë të hapura për qarkullim. Vijon monitorimi i situatës dhe kriposja e segmenteve problematike. Në aksin Qafë Plloçë–Qukës, qarkullimi është mbyllur përkohësisht për shkak të pastrimit të masivit shkëmbor.

OSHEE
Aktualisht, 16 abonentë në zonat rurale të Krushovës dhe Prenishtit janë pa energji elektrike. OSHEE bën me dije se konsumatorët me rëndësi të veçantë furnizohen normalisht dhe po punohet për rikthimin e plotë të energjisë.

Hydropower Devoll – Diga e Moglicës
Shkarkimet nga diga e Moglicës pritet të mbyllen së shpejti. Situata po monitorohet në mënyrë të vazhdueshme për të garantuar sigurinë në zonat përreth.

Të gjitha strukturat mbeten në gatishmëri dhe në koordinim të plotë për menaxhimin e çdo situate të mundshme emergjente.