Ministri iranian i Mbrojtjes, Aziz Nafizardeh, ka deklaruar këtë të mërkurë se Irani është plotësisht i përgatitur të reagojë ushtarakisht nëse Shtetet e Bashkuara ndërmarrin një sulm ndaj territorit iranian. Në një paralajmërim të drejtpërdrejtë, ai theksoi se çdo bazë ushtarake amerikane në rajon do të kthehet në objektiv të menjëhershëm.

Sipas Nafizardeh, përgjigjja e Teheranit nuk do të kufizohet vetëm ndaj forcave amerikane. Ai bëri të ditur se edhe instalimet ushtarake të vendeve që mbështesin ose bashkëpunojnë me SHBA-në në një ofensivë kundër Iranit do të konsiderohen objektiva legjitime.

“Çdo agresion ndaj Iranit do të marrë një kundërpërgjigje të fortë dhe të dhimbshme,” deklaroi ministri, duke shtuar se forcat e armatosura iraniane janë në gjendje gatishmërie të plotë dhe të përgatitura për çdo skenar të mundshëm.

Deklarata vjen në një klimë tensioni të shtuar në Lindjen e Mesme, mes paralajmërimeve reciproke dhe rritjes së shqetësimeve për një përshkallëzim të mundshëm ushtarak. Autoritetet iraniane kanë theksuar vazhdimisht se nuk kërkojnë konflikt, por do të reagojnë pa hezitim ndaj çdo kërcënimi ndaj sovranitetit të vendit.