Një 24-vjeçar shqiptar është shpallur fajtor dhe është dënuar me 18 muaj burgim në Shtetet e Bashkuara të Amerikës, bëri të ditur Zyra e Prokurorit të Distriktit të Iowa-s.

Vendimi ndaj Mario Nikprelajt u dha vetëm shtatë muaj pas incidentit të rëndë të ndodhur në një fluturim të “Delta Airlines”, ku ai tentoi të hapte me forcë derën e avionit gjatë fluturimit, duke rrezikuar seriozisht sigurinë e pasagjerëve dhe ekuipazhit. Sipas autoriteteve, një tragjedi ajrore u shmang vetëm falë ndërhyrjes së menjëhershme dhe përleshjes së stafit të avionit dhe stjuardesave.

Ngjarja ndodhi në korrik të vitit të kaluar, në një fluturim të Delta-s të operuar nga SkyWest, i cili ishte nisur nga Nebraska drejt Detroitit. I lindur në Michigan, 24-vjeçari nisi të shfaqte sjellje problematike që në fillim të udhëtimit.

Sipas prokurorëve dhe raportimeve të New York Post, Nikprelaj bëri “deklarata shqetësuese dhe të pahijshme” ndaj pasagjerëve të tjerë dhe anëtarëve të ekuipazhit. Ai refuzoi fillimisht të vendoste rripin e sigurimit, duke pranuar vetëm pas insistimit të një asistenteje fluturimi.

Problemet u përshkallëzuan gjatë ngritjes së avionit, kur 24-vjeçari hoqi vazhdimisht rripin e sigurimit, pavarësisht kërkesave të përsëritura të stafit, dhe u ngrit disa herë nga vendi i tij në një moment kritik të fluturimit. Sjellja e tij u cilësua si kërcënuese për sigurinë e fluturimit.

Sipas autoriteteve amerikane, kulmi i incidentit u arrit kur Nikprelaj tentoi të hapte derën e avionit në ajër, duke detyruar ekuipazhin të ndërhynte fizikisht për ta neutralizuar dhe për të parandaluar pasoja fatale.

Pas hetimeve dhe procedurave gjyqësore, gjykata e shpalli fajtor 24-vjeçarin, duke e dënuar me 18 muaj burgim. Autoritetet theksuan se raste të tilla trajtohen me tolerancë zero, pasi rrezikojnë drejtpërdrejt jetën e dhjetëra pasagjerëve dhe sigurinë e aviacionit civil.