Hetimet për zhdukjen e Floreshë Prengut, 35-vjeçare nga Trento, kanë përfunduar tragjikisht. Trupi i saj u gjet përgjatë lumit Adige, rreth 40 km larg banesës, ndërsa identifikimi zyrtar u krye këtë të enjte nga familjarët.

Prengu ishte raportuar e zhdukur më 22 tetor, kur u pa për herë të fundit në qendër të qytetit të Trentos. Menjëherë pas zhdukjes, familja njoftoi autoritetet, duke nisur një operacion kërkimi që përfshiu patrulla përgjatë lumit, ekipe zjarrfikësish vullnetarë dhe kontrolle ajrore me helikopterë.

Për më shumë se dy muaj, rasti u shpërnda në të gjitha prefekturat italiane, pa rezultate konkrete mbi vendndodhjen e saj. Autoritetet theksojnë se hipoteza kryesore është se 35-vjeçarja është rrëzuar në rrjedhën e lumit Adige dhe nuk i ka mbijetuar. Hetimet do të vazhdojnë për të sqaruar plotësisht rrethanat e ngjarjes dhe për të përjashtuar çdo pistë tjetër.