Një situatë e rëndë dhe e paprecedentë është raportuar mbrëmjen e sotme në Reanimacionin Qendror të QSUT-së, ku ndërprerja e energjisë elektrike ka vënë në rrezik funksionimin e repartit më kritik të spitalit më të madh në vend.

Sipas denoncimeve nga qytetarë dhe familjarë të pacientëve, ikja e dritave ka krijuar kaos dhe pasiguri totale, duke paralizuar punën e stafit mjekësor dhe duke alarmuar të afërmit e pacientëve në gjendje të rëndë shëndetësore.

Burime nga brenda QSUT-së bëjnë me dije se, për shkak të dështimit të sistemit elektrik dhe mosfunksionimit të kushteve minimale në reanimacion, pacientët janë nxjerrë me urgjencë nga dhomat e kujdesit intensiv dhe janë transferuar nëpër korridoret e spitalit, në kushte që konsiderohen jashtë çdo standardi sigurie.

Një qytetar i pranishëm në spital ka denoncuar situatën dramatike:

“Situata doli jashtë kontrollit. Ka ikur korrenti dhe pacientët po i nxjerrin nga reanimacioni nëpër korridore. Nuk dihet se çfarë po bëhet, jemi në ankth të plotë sepse dritat nuk po vijnë.”

Një tjetër mesazh alarmues i mbërritur nga ambientet e QSUT-së thotë:

“Rast emergjent, ju lutem postojeni ta shohë Kryeministri. Shikoni çfarë bëhet tek spitali ‘Nënë Tereza’. Nuk ka drita dhe kemi njerëz në reanimacion. U hapën dyert e sallave dhe brenda nuk kishte energji. Ana e reanimacionit është pa drita. Këtu të vdesin me zor.”

Ngjarja ka ngritur pikëpyetje serioze mbi funksionimin e gjeneratorëve dhe sistemit të emergjencës, në një repart ku jeta e pacientëve varet drejtpërdrejt nga aparaturat mjekësore dhe furnizimi i pandërprerë me energji elektrike.

Deri në këto momente nuk ka një reagim zyrtar nga drejtuesit e QSUT-së apo Ministria e Shëndetësisë, ndërsa pritet të sqarohet shkaku i ndërprerjes së energjisë dhe nëse janë vënë realisht në rrezik jetët e pacientëve në reanimacion.