Operatori i Shpërndarjes së Energjisë Elektrike (OSHEE) ka reaguar pas ndërprerjes së energjisë elektrike që prej më shumë se një ore ka prekur disa zona të kryeqytetit. Sipas njoftimit zyrtar, shkak i situatës është një avari në linjën e transmetimit 110 kV të Operatori i Sistemit të Transmetimit (OST).

OSHEE bën me dije se rreth orës 20:30 është stakuar linja 110 kV Tirana 220 kV – Traktora, çka ka sjellë për disa minuta mbetjen pa energji elektrike të një pjese të Tiranës. Aktualisht, grupet e OSSH-së janë në terren dhe po punojnë për rikthimin gradual të furnizimit, duke manovruar me linjat e dyta përmes skemave unazë.

Sipas OSHEE-së, institucionet e rëndësisë së veçantë janë furnizuar me energji elektrike përmes linjave alternative, ndërsa në disa zona energjia është rikthyer brenda 30 minutash nga ndërprerja.

Megjithatë, ende raportohen zona pa energji elektrike, mes tyre:
• një pjesë e rrugës “Ali Demi”
• zona pranë Teleferikut
• Fresku
• disa zona pranë “Rrugës së Elbasanit”

OSHEE thekson se puna në terren po vijon dhe se rikthimi i plotë i energjisë elektrike do të realizohet sapo të eliminohet plotësisht avaria në linjën 110 kV, duke garantuar stabilitetin e rrjetit.