Operacionet e kërkim-shpëtimit për gjashtë personat e zhdukur pas rrëshqitjeve të fuqishme të dheut në Zelandën e Re janë ndërprerë zyrtarisht, kanë njoftuar autoritetet vendase, duke pranuar se shpresat për t’i gjetur të mbijetuar janë shuar.

Mbikëqyrësi i Policisë, Tim Anderson, deklaroi se pas ditësh të tëra kërkimesh intensive, situata është bërë e qartë. “Tragjikisht, tani është e qartë se nuk do të jemi në gjendje t’i kthejmë të gjallë në shtëpi”, tha ai.

Mes personave që rezultojnë ende të zhdukur janë edhe dy adoleshentë. Anderson e cilësoi vendimin për ndalimin e operacioneve si një lajm jashtëzakonisht të dhimbshëm për familjarët, por edhe për dhjetëra efektivë dhe vullnetarë që kanë punuar pa pushim për ditë me radhë, me shpresën e një përfundimi pozitiv.

Deri më tani, autoritetet kanë konfirmuar vdekjen e dy personave, një gruaje të moshuar dhe nipit të saj, ndërsa gjashtë të tjerë mbeten të zhdukur nën masat e dheut.

Zelanda e Re është goditur nga reshje të rrëmbyeshme shiu për disa ditë rresht, ndërsa parashikimet meteorologjike flasin për mot edhe më të lagësht gjatë fundjavës, duke rritur ndjeshëm rrezikun për rrëshqitje të tjera.

Kryeministri Christopher Luxon vizitoi zonën e prekur të premten, ku vlerësoi solidaritetin e komunitetit lokal. Ai e cilësoi “frymëzuese” mbështetjen e banorëve, të cilët janë angazhuar në pastrimin e mbeturinave dhe riparimin e dëmeve të shkaktuara nga përmbytjet.

Zona e Mali Maunganui-t, e prekur rëndë nga katastrofa, konsiderohet vend i shenjtë për popullin maori dhe është një nga kampingjet më të njohura në vend. Vitet e fundit, kjo zonë është përballur në mënyrë të përsëritur me rrëshqitje të dheut, të nxitura nga moti ekstrem.