Aksioni i Inspektoratit Kombëtar të Mbrojtjes së Territorit për prishjen e banesave, në kuadër të projektit për zgjerimin e kanalit të ujërave të larta, ka vijuar edhe këtë të martë në qytetin e Durrësit. Në lagjen numër 14, ndërhyrja është shoqëruar me rezistencë nga banorët, të cilët kërkojnë një zgjidhje emergjente për strehimin e familjeve të prekura.

“Kemi mbetur në mes të katër rrugëve”, shprehen banorët, duke theksuar se temperaturat e ulëta të dimrit i kanë detyruar të qëndrojnë në kushte të papranueshme. Sipas tyre, disa familje janë detyruar të kalojnë natën jashtë, pa një alternativë konkrete strehimi.

Ismail Jakupi, banor i zonës, deklaron se i janë drejtuar bashkisë së Durrësit me kërkesë për ndërprerjen e aksionit dhe shqyrtimin e një zgjidhjeje të drejtë për familjet e prekura. “Ne kërkojmë një zgjidhje të drejtë, pasi jemi në një situatë shumë të vështirë”, u shpreh Jakupi.

Nga ana tjetër, bashkia e Durrësit ka bërë të ditur se aksioni i IKMT-së nuk mund të ndërpritet, pasi lidhet me sigurinë e infrastrukturës dhe mbrojtjen e zonës nga rreziku i përmbytjeve. Sipas bashkisë, afati dhjetëditor i parashikuar për procesin e legalizimit nuk ka përfunduar ende, ndaj familjet duhet të presin për hapa të mëtejshëm institucionalë.

Ndërkohë, banorët shprehen të pasigurt për të ardhmen e tyre të afërt, duke kërkuar ndërhyrje të menjëhershme për të mos mbetur pa strehë dhe pa një zgjidhje konkrete në kulmin e dimrit.