Presidenti amerikan Donald Trump ka paralajmëruar udhëheqësit iranianë për të arritur një marrëveshje, duke lënë të kuptohet se në rast refuzimi, Shtetet e Bashkuara mund të ndërhyjnë ushtarakisht.

Përmes një reagimi në platformën e tij sociale, Truth Social, Trump njoftoi se një flotë e madhe ushtarake, e kryesuar nga aeroplanmbajtësja Abraham Lincoln, është dërguar drejt Iranit. Sipas tij, operacioni është i gatshëm për të ndërhyrë me shpejtësi dhe forcë, nëse Teherani nuk pranon të ulet në tryezën e bisedimeve për një marrëveshje.

Trump theksoi se synimi është një marrëveshje e drejtë dhe e barabartë, pa armë bërthamore, që të jetë e dobishme për të gjitha palët:

“Shpresojmë që Irani të vijë shpejt në tryezë dhe të negociojë një marrëveshje të drejtë dhe të barabartë – JO ARMË BËRTHAMORE. Koha po mbaron, është thelbësore!”

Presidenti amerikan kujtoi gjithashtu ndërhyrjet e mëparshme, duke paralajmëruar se një sulm i ardhshëm mund të jetë më i madh dhe më i ashpër se aksionet e mëparshme, nëse nuk arrihet marrëveshja.