Sot në Komisionin për Kulturën, Turizmin dhe Diasporën u zhvillua një seancë dëgjimore për projektin TID në Durrës, me pjesëmarrjen e përfaqësuesve nga Ministria e Turizmit, Kulturës dhe Sportit dhe një grup banorësh të qytetit.

Kryetarja e komisionit, Ina Zhupa, falënderoi pjesëmarrësit dhe Bashkinë e Durrësit, e cila ishte përfshirë vetëm në mënyrë shkresore, pasi nuk ka rol në projektin e Fondacionit Shqiptaro Amerikan për Zhvillim (AADF). Zhupa theksoi se AADF refuzoi të marrë pjesë dhe të japë llogari publike para Kuvendit për menaxhimin e pronës publike dhe interesit publik.

“Sot jemi përballë faktit që Kuvendi i Shqipërisë nuk mund të detyrojë një institucion privat të vijë në dëgjesë. Kjo konfirmon shqetësimet e opozitës për ndërhyrjen e AADF në pasuritë publike shqiptare: Butrinti, Piramida, Elbasani, Gjirokastra, Ohri”, tha Zhupa. Ajo shtoi se interesi publik duket i lënë në dorë të privatit, pa mekanizma për t’i kërkuar llogari.

Nga ana e banorëve, Entela Koja, arkitekte dhe urbaniste dhe një nga pronaret e banesave të prekura nga projekti, deklaroi se TID ka shkelje të rënda në të drejtat qytetare dhe pronësisë. Ajo shtoi se deri në daljen e VKM-së së shpronësimit në gusht, banorët nuk janë pyetur. Koja përmendi ligjin 169 të vitit 2020, i cili parashikon konsultime me prezencë dhe marrje mendimesh nga banorët, të cilat duhet të merren parasysh nga grupi i projektimit.