Reshjet e dendura të dëborës në Japoni gjatë dy javëve të fundit kanë shkaktuar vdekjen e 30 personave, njoftuan autoritetet lokale. Mes viktimave është edhe një grua 91-vjeçare, e cila u gjet e pajetë nën rreth tre metra dëborë jashtë shtëpisë së saj.

Rajoni më i prekur është Aomori, ku trashësia e dëborës ka arritur deri në 4.5 metra në zonat më të largëta. Për të ndihmuar banorët dhe për të menaxhuar situatën emergjente, qeveria ka dislokuar trupa ushtarake.

Kryeministrja Sanae Takaichi ka udhëzuar ministrat që të marrin të gjitha masat për të parandaluar viktima të tjera dhe aksidente, duke organizuar një mbledhje të posaçme të kabinetit. Sipas autoriteteve, një masë e fuqishme ajri i ftohtë ka goditur bregdetin e Detit të Japonisë, duke sjellë reshje dëbore shumë mbi normalin; në disa zona, reshjet kanë qenë më shumë se dyfish i mesatares sezonale.

Agjencia e Menaxhimit të Zjarrfikësve dhe Fatkeqësive konfirmoi se nga 20 janari deri të martën, 30 persona kanë humbur jetën si pasojë e kushteve ekstreme të motit, duke e bërë këtë një nga valët më të rënda të borës në Japoni gjatë dekadave të fundit.