Në qytetin e Vlorës ka nisur ndërhyrja për prishjen e ndërtimeve pa leje mbi kanalet e ujërave të larta, një veprim që synon parandalimin e përmbytjeve dhe minimizimin e rreziqeve për qytetarët.

Kryebashkiakja Brunilda Mersini inspektoi zonën dhe theksoi rëndësinë e këtyre ndërhyrjeve, duke sqaruar se problematikat lidhen drejtpërdrejt me ndërtimet e paligjshme mbi kolektorë dhe kanalet kryesore të ujërave. Puna nisi me pastrimin e kanalit të Naunkës, ndërsa në zonën e Karabashit, ku ka banesa mbi kolektor, ndërhyrjet po vijojnë me intensitet.

Mersini bëri të ditur se të prekurve nga prishjet do t’u ofrohen zgjidhje alternative, përfshirë bonus qiraje ose banesa sociale, duke u garantuar qytetarëve mbështetje gjatë këtij procesi. Bashkia synon që dimrin e ardhshëm Vlora të mos përballet me situata të ngjashme si ato të dy viteve më parë.